Landið skal eftir ætlan rinda sín part av nýggja ítróttaháskúlanum í Vági, og pengar eru settir av næstu árini. Tað sigur Bárður á Lakjuni, landsstýrismaður í mentamálum, við Kringvarpið.

Nordea-grunnurin hevur játtað 39,8 milliónir krónur til byggingina. Treytin er tó, at landið eisini játtar skúlanum somu upphædd.

Bárður á Lakjuni sigur við Kringvarpið, at pengar fyrr í ár eru játtaðir til projekteringina. Nakað vantar enn í, men sambært landsstýrismanninum koma teir pengarnir næsta ár.

Lesið eisini: Nýggjur skúli kann nú gerast veruleiki í Vági

Projekteringin skal verða liðug, áðrenn ein heimildarlóg verður løgd fyri løgtingið til samtyktar.

– Tað stendur í háskúlalógini, at landið kann fíggja upp til helvtina av slíkum verkætlanum, og eg eri rættiliga vísur í, at hetta verður til veruleika, sigur Bárður á Lakjuni við Kringvarpið.

Hann vísir á, at lagt er upp fyri byggingini við játtanum fram til 2029, og at hann avgjørt roknar við, at løgtingið fer at siga ja.

Umframt játtanina frá Nordea-grunninum hevur Fólkatingið játtað fimm milliónir krónur til verkætlanina. Vágs kommuna hevur latið byggiøkið.