Um 18-tíðina í gjár kannaði løgreglan trý prutl í Runavík. Tey vórðu øll royndarkoyrd, og úrslitið var, at øll kundu koyra skjótari enn loyvt er.

Allir tríggir førararnir fingu bót. Ein teirra hevði heldur ikki koyrikort og varð eisini skuldsettur fyri tað. Hjá hinum báðum vóru koyrikortsviðurskiftini í lagi, upplýsir vaktleiðarin hjá løgregluni í morgun.

Í Suðuroy varð ein bilførari tikin fyri at koyra í frákenningartíðini. Viðkomandi varð eisini skuldsettur fyri rúsdrekkakoyring.

Løgreglan fekk eisini fráboðanir um tvey ferðsluóhapp seinasta samdøgrið.

Á Velbastaðhálsi rendi ein bilur upp í bilin frammanfyri. Fremri bilurin bremsaði, og førarin í aftara bilinum náddi ikki at steðga. Eingin fólkaskaði var, men nakað av materiellum skaða.

Um 16-tíðina var eitt annað ferðsluóhapp í miðbýnum í Havn. Har helt ein bilførari ikki víkiskylduna og koyrdi út fyri ein annan bil.

Førarin, sum ikki helt víkiskylduna, hevði heldur ikki koyrikort og varð eisini skuldsettur fyri tað.