Innflutningurin av akførum vaks 175,5 milliónir krónur í uppgerðarárinum frá august 2025 til juli 2026.
Tað vísa nýggj tøl frá Hagstovu Føroya.
Samlaði innflutningurin var góðar 11,9 milliardir krónur. Tað eru knappar 1,3 milliardir krónur meira enn undanfarna 12-mánaðarskeið. Vøksturin svarar til 11,8 prosent.
Innflutningsvirðið vaks í øllum høvuðsvørubólkum uttan í bólkinum fyri ídnaðarvørur, sum eru flokkaðar eftir ráevni.
Innflutningurin av matvørum og livandi djórum vaks góðar 231 milliónir krónur, ella 9,6 prosent. Av hesum stava 171 milliónir krónur frá fiski, sum er innfluttur til virkingar í Føroyum.
Virðið á innfluttari djóra- og plantuolju vaks knappar 159 milliónir krónur. Hetta stavar fyri tað mesta frá rapsolju.
Innflutningurin úr ES vaks meira enn 300 milliónir krónur. Innflutningurin av oljuúrdráttum úr ES vaks knappar 141 milliónir krónur, meðan innflutningurin av akførum vaks nærum 142 milliónir krónur.
Innflutningurin úr øðrum londum í Evropa vaks 158 milliónir krónur. Talan var serliga um djóraolju og serligar maskinur til ídnaðarbrúk.
Innflutningurin úr ES hevur verið vaksandi síðan summarið 2024 og er nú umleið 440 milliónir krónur um mánaðin. Tað er á leið sama støði sum undan 2022.
Innflutningurin úr evropeiskum londum uttan fyri ES er samstundis vaksin úr umleið 100 milliónum krónum upp í umleið 250 milliónir krónur um mánaðin seinastu árini.
