Innflutningurin av vørum er vaksin munandi seinasta árið.
Sambært nýggjastu tølunum hjá Hagstovu Føroya varð innflutt fyri góðar 12,1 milliardir krónur í 12 mánaðarskeiðinum frá september 2025 til august 2026. Tað eru góðar 1,2 milliardir krónur meira, ella 11 prosent, enn í undanfarna 12 mánaðarskeiðinum.
Serliga innflutningurin av maskinum, motorum, skipum og akførum er vaksin nógv. Hesin vørubólkurin vaks við 699 milliónum krónum, ella 27,8 prosentum, upp í góðar 3,2 milliardir krónur.
Innflutningurin av matvørum og livandi djórum vaks samstundis við 162 milliónum krónum, meðan djóra- og plantuoljur vuksu við 166 milliónum. Serliga rapsolja stendur fyri stórum parti av hesum vøkstrinum.
ES stendur fyri størsta partinum
Innflutningurin úr ES er vaksin við 217 milliónum krónum, úr 5,37 milliardum upp í 5,59 milliardir krónur. Tað svarar til ein vøkstur upp á 4 prosent.
Av hesum er innflutningurin av oljuúrdráttum vaksin við 148 milliónum krónum og innflutningurin av akførum við 107 milliónum.
Hagstovan vísir á, at innflutningurin úr ES hevur verið vaksandi síðani summarið 2024 og nú aftur liggur á umleið 440 milliónum krónum um mánaðin. Tað er á leið sama støði sum áðrenn 2022.
Stórur vøkstur úr Norðuramerika
Innflutningurin úr Norðuramerika er eisini vaksin nógv.
Hann fór úr 271 milliónum upp í 506 milliónir krónur – ein vøkstur upp á 235 milliónir krónur, ella nærum 87 prosent. Innflutningurin úr Evropa uttan fyri ES vaks við 258 milliónum krónum.
Í einstøkum vørubólkum er eisini stórur vøkstur. Innflutningurin av akførum er vaksin við 145 milliónum krónum, meðan plantuolja og feitt eru vaksin við 117 milliónum. Innflutningurin av fiski og fiskavørum er vaksin við góðum 95 milliónum krónum.
Tað eru tó eisini vørubólkar, har innflutningurin er minkaður. Ídnaðarvørur flokkaðar eftir ráevni eru minkaðar við 131 milliónum krónum.
