Leivur Mortensen (myndin), Tróndur Mikkelsen og liðfelagarnir í HF Karlskrona spældu í kvøld dyst á heimavølli í bestu svensku hondbóltsdeildini.
Í Brinova Arena í Karlskrona eydnaðist tað heimaliðnum at vinna annan sigurin á rað á heimavølli. Í kvøld gjørdist talan um 32-30 sigur á Lugi. Í steðginum var Karlskrona á odda 16-12.
Tróndur skoraði fimm mál upp á fimm málroyndir. Leivur skoraði fýra mál upp á fimm málroyndir.
HF Karlskrona er fjórðaftast í deildini við fýra stigum fyri fimm dystir.
Hósdagin klokkan 17.30 hevur HF Karlskrona dyst á útivølli móti Skånela.
