Jacob Vestergaard, landsstýrismaður í vinnumálum, er sinnaður at kanna, um reglur kunnu setast fyri kappbjóðing við húsasølu. Tað sigur hann í einum § 52a-svari til Súsannu Bertholdsen, løgtingskvinnu, sum hevur spurt, um landsstýrismaðurin vil kanna og møguliga seta í verk reglur, ið tálma uppboðslíknandi kappbjóðing.
Prísirnir á húsum og íbúðum eru hækkaðir í nógv ár, og tað ger tað serliga trupult hjá teimum, sum skulu keypa sítt fyrsta heim, sigur landsstýrismaðurin. Hann vísir á, at fleiri orsakir helst eru til prísgongdina, men heldur, at verandi mannagongd, har øll boð verða løgd út á heimasíðuna hjá ognarmeklaranum í 48 tímar, ger støðuna verri hjá keyparunum.
Heimildin hevur staðið óbrúkt
Lógin um keyp og sølu av fastogn frá 2011 ásetur millum annað, hvør kann reka ognarmiðlanarvirksemi, og hvørjar upplýsingar skulu gevast um kontantprísin. Jacob Vestergaard metir, at lógin í ávísan mun gevur keyparum greiðar og tryggar karmar, men at mannagongdirnar fyri boðgeving eru minni greiðar.
Lógin heimilar landsstýrismanninum at seta reglur um sølu, har keyparar verða bidnir um at geva boð. Tað fevnir eisini um rættin til at fáa upplýsingar um, hvørji boð eru komin inn. Heimildin hevur higartil staðið óbrúkt, og ognarmeklararnir hava sjálvir ment mannagongdirnar, sum verða nýttar í dag.
Jacob Vestergaard nevnir donsku skipanina sum ein møguligan íblástur. Hann hevur fyribils sagt seg vera sinnaðan at kanna málið. Sambært landsstýrismanninum kunnu reglurnar sannlíkt setast við heimild í verandi lóg.