Einki vaksnamannalið í fótbólti hevur vunnið FM í fótbólti oftari enn kvinnurnar hjá KÍ.

Seinnapartin er staðfest, at KÍ á 25-unda sinni er føroyameistari í bestu kvinnudeildini, ið er met.

HB hevur við 24 meistaraheitum metið hjá monnunum.

KÍ-kvinnurnar staðfestu føroyameistaraheitið við einum 6-0 sigri á Skála ÍF á vøllinum við Djúpumýru í Klaksvík.

Durita Hummeland (myndin) og Heidi Sevdal og Ranja Joensen syrgdu fyri málunum. Tær skutu tvey mál hvør.

Longu tá 13 minuttir vóru leiktir hevði KÍ tamarhald á dystinum, og var á odda 2-0.

KÍ hevur 52 stig nú tveir dystir eru eftir at leika. HB kann í besta føri røkka 50 stigum.

KÍ-Skála ÍF 6-0 (3-0)

1-0 Heidi Sevdal (11.)

2-0 Durita Hummeland (13.)

3-0 Durita Hummeland (39.)

4-0 Heidi Sevdal (67.)

5-0 Ranja Joensen (87.)

6-0 Ranja Joensen (89.)

Kelda: dystir.fo

In.fo ynskir KÍ-kvinnunum hjartaliga tillukku við føroyameistaraheitinum, og metinum í vaksnamannafótbólti við 25 meistaraheitum.