Landsstýrið ætlar at spara milliónir við at lata føroysku sendistovurnar í Moskva, London og Tel Aviv aftur. Men sambært Bill Justinussen, løgtingsmanni fyri Fólkaflokkin, er ikki politisk semja í samgonguni um alla ætlanina.
– Vit hava tikið undir við Moskva og London, men ikki Tel Aviv, sigur hann við Sosialin.
Bill Justinussen leggur dent á, at mótstøðan ikki bara er hansara egna. Sambært honum stendur ein samdur tingbólkur hjá Fólkaflokkinum aftan fyri at varðveita sendistovuna í Ísrael.
Hann sigur eisini, at hann ikki kendi ætlanina, áðrenn hon varð løgd fram.
– Tað er ikki avtalað í samgonguni. Hann hevur ikki fingið grønt ljós frá Fólkaflokkinum, sigur Bill Justinussen um Bárð á Steig Nielsen, landsstýrismann í uttanríkismálum.
Fyri landsstýrismannin snýr broytingin seg um at raðfesta orkuna og pengarnar øðrvísi. Føroyar kunnu ikki hava sendistovur allastaðni, og ætlanin er í størri mun at velja ítøkilig átøk uttanlands saman við vinnuni.
Bill Justinussen heldur hinvegin, at sendistovan í Tel Aviv hevur ein serligan týdning, og at tað sendir eitt skeivt signal at lata hana aftur júst nú. Hann ætlar tí at taka málið upp bæði í egnum flokki og við landsstýrismannin.
Í nýggja Sosialinum greiðir Bárður á Steig Nielsen frá, hvussu hann vil skipa føroysku umboðanina uttanlands, og hvat skal koma í staðin fyri tær tríggjar sendistovurnar. Bill Justinussen greiðir frá, hví Tel Aviv er eitt hjartamál, og hví hann heldur, at ætlanin fer út um tað, sum er avtalað í samgonguni.
Les samrøðurnar við Bárð á Steig Nielsen og Bill Justinussen í Sosialinum hetta vikuskiftið. Blaðið fæst í leysasølu kring landið. Haldarar kunnu lesa blaðið á sos.fo við at logga á við haldaranummarinum
