Jacob Vestergaard, landsstýrismaður í samferðslumálum, hevur lagt uppskot fyri Løgtingið um at keypa fýra nýggjar høvuðsmotorar til Smyril.

Sambært uppskotinum verður samlaði kostnaðurin mettur til í mesta lagi 74,4 milliónir krónur. Umleið helvtin fer til sjálvt keypið av motorunum, meðan hin helvtin fer til ísetingina.

Ætlanin er at skifta motorarnar, tá Smyril aftur skal í dokk í 2028. Teir mugu kortini bíleggjast longu nú, tí veitingartíðin er long.

Smyril varð bygdur í Spania og kom til Føroya í 2005. Skipið røkir Suðuroyarleiðina og hevur eina sera tunga rakstrargongd. Hann leggur at og fer frá landi umleið 3.700 ferðir um árið og siglir í miðal ellivu og ein hálvan tíma um samdøgrið.

Verandi høvuðsmotorar hava sostatt verið nógv nýttir í meira enn 20 ár.

Smyril var í 2025 til 20 ára klassing á Fayard-skipasmiðjuni í Danmark. Tá vórðu millum annað tríggir hjálpimotorar skiftir, og tvær síðuskrúvur settar í afturskipið. Longu tá varð boðað frá, at næsta stóra arbeiðið verður at skifta allar fýra høvuðsmotorarnar í 2028.

Málið er lagt fram sum LM-037/2026. Løgtingið skal nú taka støðu til, um landsstýrismaðurin fær heimildina at keypa motorarnar. Kringvarpið hevur eisini umrøtt kostnaðin.