Bara eftir umleið trimum korterum hava trý fólk vent sær til løgregluna, eftir at tey vóru uppringd av fólki, sum royndu at fáa persónligar bankaupplýsingar frá teimum.

Teldusníkarnir ringja frá donskum telefonnumrum og geva seg út fyri at hava samband við løgregluna. Í samrøðuni verður millum annað víst til Keypmannahavnar Politi og Noreg, og sagt verður frá pengaflytingum, sum skulu vera farnar fram. Í einum føri varð nevnd ein flyting upp á 9.000 norskar krónur.

Eitt navn, sum verður brúkt í sambandi við svikið, er Lars Tvede, men sambært løgregluni er talan um falskar upplýsingar.

Endamálið er at fáa tann uppringda at lata frá sær kontu- ella bankaupplýsingar.

Tey trý fólkini, sum hava vent sær til Føroya Politi í morgun, lótu seg tó ikki lumpa. Ein teirra segði við uppringjaran, at viðkomandi fyrst fór at seta seg í samband við sín egna banka.

Løgreglan heitir á fólk um at vera sera varin, um tey fáa slíkar uppringingar, og ikki lata frá sær bankaupplýsingar.