Liðið hjá landsliðsliðskiparanum, Pernille Brandenborg, CSM Bukarest er næstfremst í rumensku hondbóltsdeildini við 19 stigum fyri 11 dystir. Tær eru bert eitt stig aftanfyri oddaliðið, Bistrita sum hevur 20 stig.
Í kvøld vann CSM Bukarest á heimavølli greiðan 31-20 sigur á Zalau. Í steðginum var heimaliðið á odda 15-11.
Pernille skoraði tvey mál upp á tríggjar málroyndir. Pernille var eisini noterað fyri at blokkera eitt skot í verjustøðu.
Nú fer Pernille at fokusera upp á uppgávurnar við føroyska landsliðnum, sum í komandi viku er í Tróndheimi fyri at spæla venjingardystir móti krútsterku liðunum, Noreg og Danmark. Eftir tað er EM-endaspæl á skránni, har Føroyar eru í innleiðandi bólki saman við Póllandi, Ukraina og Fraklandi. Dystirnir vera leiktir í Katowice í Póllandi.