Amerikanski forsetin, Donald Trump, hóttir við at leggja ein stóran skatt á amerikanskar fyritøkur, sum byggja dátumiðstøðir uttanlands.
Tað segði hann á einum tíðindafundi í Hvítu Húsunum fríggjadagin, skriva Ritzau og AFP.
– Tær kunnu gera tað, um tær vilja. Men so leggja vit ein ovurstóran skatt á, segði Trump.
Hann segði eisini, at Kina fór at „taka tær allar“, um dátumiðstøðirnar vórðu bygdar uttanlands.
Menningin av vitlíki krevur nógva rokniorku, og stórar dátumiðstøðir brúka nógv av bæði streymi og vatni. Ætlanir um nýggjar miðstøðir hava elvt til mótstøðu í fleiri lokalsamfeløgum í USA, millum annað vegna stúran um hægri elprísir og dálking.
Trump hevur ávarað um, at forðingar fyri at byggja dátumiðstøðir í USA kunnu veikja leiðandi støðuna hjá landinum innan vitlíki.
USA hevur longu sett avmarkingar á útflutningin til Kina av teimum mest framkomnu kippunum hjá amerikanska tøknifelagnum Nvidia.
Ritzau/AFP