Beinir Johannesen, løgmaður, hevur í kvøld kallað forfólkini í øllum politisku flokkunum á fund í næstum. Tey skulu umrøða, hvussu flokkarnir í felag kunnu arbeiða víðari við málinum.
– Vit kunnu ikki peika eftir øðrum longur. Nú liggur bólturin hjá okkum, skrivar løgmaður.
Ítróttasamband Føroya boðaði fyrr í dag frá, at Altjóða Olympiska Nevndin, IOC, heldur fast við, at føroysku hondbóltslandsliðini ikki kunnu luttaka í olympisku kappingunum í 2028, sjálvt um tey vinna sær pláss. Sambært ÍSF er tað ríkisrættarliga støðan hjá Føroyum, sum forðar fyri luttøku.
Vil broyta karmarnar í ríkisfelagsskapinum
Løgmaður sigur, at politisku flokkarnir eru samdir um, at Føroyar skulu hava limaskap í IOC, og vísir á, at málið stendur í samgonguskjalinum.
Hann heldur, at IOC-málið er ein av fleiri orsøkum til at broyta karmarnar í ríkisfelagsskapinum. Sambært løgmanni geva verandi karmar Føroyum ov avmarkaðar uttanríkispolitiskar heimildir til at umboða seg úti í heimi.
– Mítt mál er at finna eina loysn millum allar flokkar, skrivar Beinir Johannesen.