Tað sigur Beinir Johannesen, løgmaður í kvøld.

Hann vísir á, at á allarfyrsta fundi við danska forsætisráðharran, Mette Frederiksen, vísti hann á, at í føroyska samgonguskjalinum stendur:

»Føroyar skulu fáa staðfest sjálvsavgerðarrætt í øllum viðurskiftum, ið viðvíkja Føroyum.«

– Tí tað er umráðandi, at Føroyar fáa somu viðurkenning av sjálvsavgerðarrættinum, sum Grønland hevur fingið. Til dømis stendur í danska samgonguskjalinum, at:

»Regeringen anerkender, at det grønlandske folk er et folk i henhold til folkeretten med ret til selvbestemmelse, og at beslutninger om Grønlands fremtid træffes af det grønlandske folk og ingen andre.«

– Sama stendur ikki um Føroyar. Og tað havi eg eisini gjørt vart við, sigur løgmaður.

Hann vísir á, at fólkarættarliga viðurkenningin av sjálvsavgerðarrættinum ljóðar kanska háfloygt, men tað merkir, at í Føroyum ráða føroyingar, og avgerðir um Føroya framtíð verða tiknar av føroyingum og ongum øðrum.

– Vit vita ikki, nær føroyingar skulu taka støðu um Føroya framtíð. Tað kann vera um stutta ella langa tíð.

– Men vit vita, at um vit skulu taka støðu, so skulu vit hava eina viðurkenda, fólkarættarliga vissu fyri, at føroyingar eiga rættin at avgera framtíðina hjá Føroyum.

– Avtalan, sum bleiv undirskrivað í New York í dag, burdi slóðað fyri, at vit verða javnsett við Grønland, hvat hesum viðvíkur, sigur løgmaður.

– Hetta hevði ikki broytt gerandisdagin hjá føroyingum í morgin. Men tað hevði verið eitt stórt og prinsipielt stig rætta vegin fyri okkara land – og avgjørt nakað, vit eiga at standa saman um, sigur Beinir Johannesen, løgmaður.