Løgreglan fekk tilsamans 51 fráboðanir í sambandi við stormin í gjár. Fyrsta fráboðanin kom klokkan 12.40, og tann seinasta kom klokkan 00.10 í nátt.

Talið gevur tó ikki eina fullfíggjaða mynd av skaðunum. Løgreglan vísir á, at tryggingarfeløgini vanliga fáa fleiri fráboðanir enn løgreglan, tí allir skaðar verða ikki meldaðir til politiið.

Næstan helvtin av fráboðanunum til løgregluna snúði seg um tekjur. Takplátur, ryggásir og úthang loysnaðu í nógva vindinum.

Harumframt komu fýra til fimm fráboðanir um vatnskaðar og nakrar um vindeygu, sum vórðu brotin av lutum, ið komu fúkandi.

Millum størru hendingarnar var eitt seyðahús á Skála, sum endaði í einum sethúsum. Í Hvannasundi fór eitt neyst alt sum tað var, og tekjan á HP Jarn í Hvalvík reiv. Løgreglan sendi í tí sambandi út ávaring til fólk í Hvalvík og Streymnesi um at halda seg innandura, tí takplátur og annað tilfar var farið við vindinum og kundi vera vandamikið fyri fólk.

Neyðugt var eisini at tryggja tekjuna á Christianskirkjuni, sum er undir umbygging. Stórur byggipallur er kring kirkjuna, og dúkur við krympiplasti spentur um kirkjuna, sum var við at fara í vindinum.

Løgreglan fekk eisini fráboðanir um millum annað ein vogn til hestaflutning, altanir og fleiri aðrar tekjur.

Ódnarveðrið elvdi harumframt til trupulleikar á vegunum. Omanlop vóru á Funningsvegnum og Fuglafjarðarvegnum, og við Skipanes var so nógv vatn á vegnum, at mett varð ikki trygt at koyra.

Fráboðanirnar komu javnt frá klokkan 12.40 til umleið klokkan 16. Frá klokkan 16 til 18 komu bert tvær fráboðanir, men frá klokkan 18.01 tók tað seg uppaftur og helt fram til eftir midnátt.