Málsviðgerðin hevur staðið í stað ov leingi. Tað er niðurstøðan hjá Føroya rætti í úrskurði í dag, skrivar Kringvarpið.

Bakkafrost er ákært fyri seks brot á flutningskunngerðina í 2020. Ákæruvaldið sigur, at felagið hevur framt flutningar í Suðuroynni uttan loyvi frá Heilsufrøðiligu starvsstovu. Harumframt snýr málið seg um ein flutning úr Froðba til Porkeris, sum ikki varð førdur í flutningsbókina.

Rætturin hevur ikki tikið støðu til sjálvar ákærurnar. Verjin hjá Bakkafrosti gjørdi galdandi, at málini vóru fyrnd, og hesin spurningurin varð tí viðgjørdur fyrst.

Meldað í 2021

Sambært Kringvarpinum meldaði Heilsufrøðiliga starvsstova Bakkafrost í 2021, men ákærurnar komu ikki fyrr enn í apríl í ár.

Upprunaliga fevndi fráboðanin um bæði flutningskunngerðina og lúsakunngerðina. Starvsstovan mælti tá til eina sekt á 67 milliónir krónur.

Løgreglan hevur áður viðgingið, at málsviðgerðin hevur tikið ov langa tíð.

Ákæruvaldið kann kæra úrskurðin til Landsrættin og hevur nú 14 dagar at umhugsa hetta, skrivar Kringvarpið.

Les meira hjá Kringvarpinum.