Amerikanski forsetin, Donald Trump, sigur, at USA eftir 2026 ikki longur fer at lata Ísrael eina fasta upphædd á fýra milliardir dollarar um árið. Tað svarar til umleið 27 milliardir krónur.

Tað sigur hann við Fox News sambært Reuters.

Sambært Trump er avgerðin tikin í samráði við ísraelska forsætisráðharran, Benjamin Netanyahu.

– Bibi Netanyahu og eg avtalaðu fyri fleiri mánaðum síðani, at vit steðga hesum, sigur Trump.

Hann leggur tó dent á, at USA framvegis fer at hjálpa Ísrael, um tørvur verður á tí.

Enn eingin viðmerking úr Ísrael

Eingin viðmerking er komin til útsøgnina frá skrivstovuni hjá Netanyahu hevur í dag.

Ísraelski miðilin Times of Israel vísir á, at galdandi tíggju ára avtalan millum londini um hernaðarstuðul á 3,8 milliardir dollarar um árið ikki gongur út fyrr enn við árslok 2027.

Sambært miðlinum hevur Netanyahu fleiri ferðir sagt, at hann ynskir at minka amerikanska stuðulin niður í einki, men at hetta skal gerast yvir tíggju ár.

Útsøgnin hjá Trump fellur sostatt ikki saman við tíðarætlanini í galdandi avtalu.

Stuðulin elvir til kjak

USA er nærmasti sameindi hjá Ísrael og hevur ígjøgnum søgu landsins verið ein avgerandi fíggjarligur stuðul.

Seinastu árini hevur stuðulin tó elvt til kjak í USA. Serliga millum demokratiskar veljarar hevur atfinning verið móti stuðlinum í sambandi við ísraelska krígsførsluna í Gaza.

Eisini í egnum baklandi hjá Trump hevur verið atfinning. Fleiri republikanarar hava kravt, at USA í størri mun raðfestir trupulleikar heima heldur enn at senda pengar av landinum.

Útsøgnin kemur sama dag, sum amerikanarar eru á miðvalið. Republikanararnir hava meiriluta í báðum kømurunum í Kongressini, men kunnu missa hann á valinum.

Ritzau