Maria P. Nólsoy og liðfelagarnir í Keypmannahavn høvdu sera tungan arbeiðssetning í fjórðingsfinaluni í donsku steypakappingini. Talan var um fjórðingsfinalu á útivølli móti verandi meistarunum, Esbjerg.

Esbjerg hevði eina risastóra favorittstøðu hjá veddingarfyritøkunum, men tað eydnaðist Keypmannahavn at skelka Esbjerg í fyrra hálvleiki. Í steðginum var Keypmannahavn sensasjónelt á odda 18-13 frammanfyri stóru heimafjøldini, ið taldi næstan 1.700 áskoðarar.

Í seinna hálvleiki reistist Esbjerg tó, og tað eydnaðist heimaliðnum við einum brotskasti í allarseinasta sekundinum at tryggja sær ein tepran 32-31 sigur.

Maria og liðfelagarnir kunnu tó lyfta høvdið høgt aftaná eitt rimmar avrik móti einum av heimsins fremstu liðum í felagsliðshondbólti.

Maria skoraði tvey mál upp á fimm málroyndir, og hon legði upp til fimm mál.

Klokkan 19.30 byrjaði fjórðingsfinalan í BIOCIRC Arena í Viborg, har Jana Mittún og liðfelagarnir spæla móti Ikast.