Tíðindaskriv:

Frá kl. 9-14.30 er dagurin fyri 3. árs næmingar á miðnámi og 9. og 10. fl. í fólkaskúlanum. Frá kl.14.30-18.00 lata dyrnar upp fyri almenninginum. Tá eru øll vælkomin at fáa kunning og íblástur um útbúgvingar í Føroyum og uttanlands, eins og lærupláss og starvsmøguleikar í Føroyum.

Kl. 14.30 endar skúladagurin hjá næminginum sum hava verið á Markleys Útbúgving  við einari samanumtøku og konsert við Bjarki Virgarsson Trondesen, sum nógv kenna frá vælumtóktu sendingini Hoydalar. Hann fer at seta ein festligan dám á endan á næmingadegnum, samstundis sum dyrnar lata upp fyri almenninginum.

Á tiltakinum ber til at hitta umboð fyri skúlar, útbúgvingarstovnar, lærupláss og aðrar stovnar. Her kunnu vitjandi hoyra um ymiskar útbúgvingar, seta spurningar og fáa vegleiðing um møguleikarnar eftir fólkaskúla og miðnám. Framsýnarar á útbúgvingarráðstevnuni eru 35 í tali.

Seinnapartin vera eisini fyrilestrar um ymiskar útbúgvingar og møguleikar. Evnini eru millum annað hægri lestur, yrkisútbúgvingar og Erasmus+. Sí skránna her

Umleið 1.100 næmingar luttaka

 Markleys útbúgving er fyri allar næmingar í Føroyum. Næmingarnir fáa eina skrá, har teir vitja básar, lurta eftir fyrilestrum og fáa vegleiðing í bólkum. Væntandi koma umleið 1.100 næmingar  til tiltakið.

Endamálið við Markleys Útbúgving er at geva teimum ungu betri innlit í útbúgvingar- og yrkismøguleikar og veita teimum vegleiðing um, hvørjar leiðir tey kunnu velja, so tey fáa eitt gott grundarlag at taka avgerðir um sína framtíð.

Foreldur, familjur og øll onnur, sum hava áhuga fyri útbúgving og starvsmøguleikum, eru hjartaliga vælkomin at vitja tiltakið frá kl. 14.30.

Tíð og stað: Mikudagin 28. oktober kl. 14.30–18.00, Við Tjarnir í Hoyvík.

Atgongd: Ókeypis.

Skrá og meira kunning: Markleys Útbúgving