Friedrich Merz, týskur samveldiskanslari, kom sunnudagin til Kyiv. Við á ferðini eru stjórar í fleiri týskum verjufyritøkum.

Reuters lýsir vitjanina sum eitt tekin um týskan stuðul til Volodymyr Zelenskyj forseta, nú Russland hevur hert álopini á Ukraina.

Ónevndar keldur nær týsku stjórnini siga, at Merz fer at kunngera ein stuðulspakka í Kyiv. Í pakkanum eru ein milliard evrur – umleið 7,5 milliardir danskar krónur – í hernaðarstuðli.

Harumframt skal Ukraina fáa 350 milliónir evrur, sum svara til umleið 2,6 milliardir krónur, til at umvæla orkukervið.

– Eg eri komin til Kyiv í dag, tí Ukraina hevur tørv á øllum okkara stuðli komandi vikurnar, sigur Friedrich Merz.

Hann vísir á, at russiskar herdeildir bumba býir, bústaðarbygningar og hitaverk.

– Verður Russland ikki steðgað, fer russiska krígsmaskinan fyrr ella seinni at venda sær móti okkum. Eg fari í dag at siga við Zelenskyj forseta, at tit framvegis kunnu rokna við okkara hjálp, sigur týski samveldiskanslarin.

Skulu framleiða dronur saman

Vitjanin væntast eisini at hava við sær eina endaliga avtalu um felags framleiðslu av ymiskum sløgum av dronum.

Zelenskyj segði mikudagin eftir eina telefonsamrøðu við Merz, at Ukraina og Týskland skjótt fóru at gera eina avtalu um framleiðslu av dronum, rakettum og tilhoyrandi ritbúnaði.

Sambært Reuters verður dentur væntandi lagdur á skjóta framleiðslu av dronum, sum kunnu berjast móti rakettdrivnum dronum. Týska verjutøknifyritøkan Quantum hevur roynt slíka tøkni við góðum úrsliti.

Zelenskyj upplýsti síðst í september, at Russland hevði sent 2.730 rakettdrivnar Shahed-dronur móti Ukraina í september. Av hesum vórðu umleið 1.500 skotnar niður ella gjørdar óvirknar.

Shahed-dronurnar eru upprunaliga framleiddar í Iran og verða ofta nýttar av russiska herinum.

Ritzau/Reuters