Týska stjórnin fer »sera skjótt« at leggja fram eitt uppskot, sum skal verja borgararnar móti methøgu brennievnisprísunum.

Tað lovaði Friedrich Merz, samveldiskanslari, týsdagin á einum vinnutiltaki, skrivar Reuters.

– Hjá nógvum fólkum, sum eru bundin at bilinum í gerandisdegnum, er markið fyri, hvat tey megna at bera, rokkið, segði hann.

Mánadagin kom bensinprísurin í Týsklandi upp á 2,28 evrur fyri liturin. Tað svarar til slakar 17 krónur og er hægsti prísur nakrantíð.

Merz greiddi ikki nærri frá, hvussu eitt inntriv kann verða skipað. Hann segði tó, at stjórnin er í samráðingum við tær 16 týsku delstatirnar og stjórnarflokkarnar í Berlin um eina loysn.

Ósemja um tiltøkini

Týski fíggjarmálaráðharrin, Lars Klingbeil úr sosialdemokratiska flokkinum SPD, sigur við Reuters, at hann enn ikki hevur hoyrt um nakað uppskot frá Merz og CDU. Hann leggur tó dent á, at neyðugt er at bera skjótt at.

SPD hevur skotið upp at leggja skatt á tær eyka inntøkurnar, sum orkufeløgini fáa av hækkandi brennievnisprísunum. Flokkurin tekur eisini undir við einum hámarksprísi fyri brúkararnar.

Eitt slíkt príshámark hevur tó møtt mótstøðu í búskaparmálaráðnum, sum CDU stendur á odda fyri. Ráðið metir, at tað verður ov trupult at fremja í verki.

Fyrr í ár lækkaði týska stjórnin orkugjaldið í mai og juni. Tað lækkaði í verki bensin- og dieselprísirnar við sløkum 1,27 krónum fyri liturin, skrivar Reuters.

Diesel eisini metdýrt í Danmark

Kríggið í Iran og ófriðurin í Hormuzsundinum hava fingið brennievnisprísirnar at hækka munandi fleiri staðni í heiminum.

Í Danmark fór dieselprísurin mánadagin upp um 19 krónur fyri liturin og kom sostatt á hægsta stig nakrantíð.

Peter Hummelgaard skrivaði týsdagin á Facebook, at stjórnarflokkarnir ikki eru blindir fyri støðuni. Stjórnin er til reiðar at bera at, um orkuprísirnir halda fram at hækka og støðan versnar, skrivaði hann, tó uttan at nevna ítøkilig tiltøk.

Keldugrundarlag: Ritzau/Reuters.