Mette Frederiksen, forsætisráðfrúa, fer sunnudagin til New York, har aðalfundur Sameindu Tjóða verður hildin í komandi viku.

Tað váttar danska forsætismálaráðið fyri Ritzau og DR.

Eisini Jens-Frederik Nielsen, grønlendskur landsstýrisformaður, er á veg yvir um Atlantshav. Tað upplýsir hann sjálvur á Facebook.

Grønland, Danmark og USA boðaðu fríggjadagin frá, at londini vænta at kunna skriva undir eina avtalu í komandi viku, sum skal styrkja trygdina í Arktis og Norðuratlantshavi.

Undirskrivingin verður væntandi í sambandi við ST-aðalfundin í New York.

– Vónandi fáa vit meira frið

Jens-Frederik Nielsen vísir á, at óvissan um framtíð Grønlands hevur elvt til stúran millum grønlendingar.

– Tað hevur verið ein trupul tíð hjá mongum heima hjá okkum, og eg veit, at bæði stúran og ótti hava verið fyri, hvat fór at henda við landi okkara. Tað havi eg tikið í størsta álvara, skrivar hann.

Á ferðini yvir Atlantshav hugsar hann um tey, sum hava stúrt fyri framtíðini.

– Eg vóni, at vit nú kunnu fáa meira frið um land okkara, skrivar Jens-Frederik Nielsen.

Lars Løkke Rasmussen, danskur uttanríkisráðharri, fer eisini til New York at taka lut á aðalfundi ST.

Ymisk orð um avtaluna

Enn er lítið alment komið fram um ítøkiliga innihaldið í avtaluni.

Mette Frederiksen segði fríggjadagin, at avtalan viðurkennir fullveldið og landafrøðiliga integritetin hjá danska ríkinum og rættin hjá grønlendska fólkinum til sjálvsavgerðarrætt.

Donald Trump, amerikanskur forseti, hevur hinvegin lýst avtaluna við øðrum orðum. Sambært honum fær USA við avtaluni „varandi eftirlit við trygdini og øllum øðrum neyðsynjarviðurskiftum í Grønlandi“.

Avtalan verður væntandi undirskrivað av Grønlandi, Danmark og USA í New York í komandi viku.