Sunnudagurin er triði og seinasti dagur á russiska tjóðartingsvalinum. Eftir ætlan lata seinastu valhølini aftur klokkan 19 føroyska tíð, skrivar tíðindastovan AFP.
Hetta er fyrsta tjóðartingsvalið í Russlandi, síðan landið gjørdi innrás í Ukraina í februar 2022. Veljast skulu 450 limir í Dumuna, niðaru deild í russiska tjóðartinginum, fyri eitt fimm ára skeið.
Væntað verður, at Sameint Russland, sum stuðlar Vladimir Putin forseta, varðveitir ráðandi støðu sína í politisku skipanini, sum er undir strongum eftirliti hjá myndugleikunum.
Krígsmótstøðufólk útihýst
Flestu valevni, sum eru ímóti krígnum í Ukraina, vórðu strikað av atkvøðuseðlunum, áðrenn valið byrjaði fríggjadagin í teimum 11 tíðarøkjunum í Russlandi.
Í síðsta mánaði staðfesti hægstirættur, at liberali flokkurin Jabloko hevði brotið valreglurnar. Flokkurin, sum vil hava vápnahvíld í Ukraina, vísti skuldsetingini aftur, skrivar Reuters.
Nøkur valevni hjá Jabloko stilla kortini upp í einmansvaldømum, har helvtin av teimum 450 tinglimunum verður vald. Sambært Reuters hevur flokkurin vanliga fingið eitt einsifrað prosenttal av atkvøðunum.
Hóast fá ivast í, at Sameint Russland aftur vinnur ein greiðan sigur, verður valið mett at kunna geva eina ábending um undirtøkuna fyri krígnum og stjórnini, skrivar AFP.
Ónøgd við búskapin
Í Moskva segði 30 ára gamla Diana leygardagin við AFP, at hon er ónøgd við búskaparligu støðuna í landinum. Hon varð ikki nevnd við eftirnavni.
– Nógv fólk hava mist arbeiðið. Lønirnar lækka nú í staðin fyri at hækka, segði hon.
Ein annar veljari, 71 ára gamla Tatiana, segði, at hon hevði atkvøtt fyri Sameindum Russlandi.
– Tað er størsti flokkurin, tann arbeiðssamasti og tann, sum fær mest av skafti, segði hon.
Sambært tølum frá russisku miðvalnevndini var valluttøkan 32,58 prosent leygardagin klokkan 12 føroyska tíð, skrivar Reuters.
Ríkisrikna tíðindastovan Tass upplýsir, at valluttøkan var komin upp á 44,64 prosent sunnunáttina klokkan tvey føroyska tíð.
Kelda: Ritzau
