Norska alifelagið Nordic Halibut hevur heitt á SB1 Markets um at selja átta milliónir partabrøv.
Málið hjá felagnum er at útvega umleið 140 milliónir krónur í okkara peningi til nýggjar íløgur í alistøðina í Torjulsvågen og til vanligan rakstur.
91 milliónir krónur eru longu tryggjaðar. Íløgufeløgini, Kontrari og Farvatn Private Equity, hava nevniliga teknað seg fyri ávikavist 70 og 21 milliónum krónum.
Kystmagasinet.no veit at siga, at útboðskursurin er settur til 17,50 krónur, sum er sløk 12 prosent lægri enn keypsskálakursurin í gjár, sum var 19,89 krónur.
Tekningartíðarskeiðið byrjaði í morgun og endar í morgin, fríggjadagin 20. november.
Víst verður á, at í seinasta ársfjórðingi tók Nordic Halibut 276 tons av kalva. Miðalvektin var 5,1 kilo, miðalprísurin var knappar 120 krónur fyri kilo, og inntøkurnar vóru 27,3 milliónir krónur.
Samstundis hevur felagið lækkað mettu tøkunøgdina fyri 2026 úr 1.500 tonsum niður í 1.200 tons.
Men, felagið væntar stóran vøkstur næstu árini.
- Ætlanin er nevniliga at taka 3.500 tons í 2027 og heili 10.400 tons í 2031, skrivar Norne Securities, sum Kystmagasinet.no endurgevur.