Serligi sendimaðurin hjá USA, Steve Witkoff, sum júst hevur verið í Noregi, hitti í dag russiska forsetan, Vladimir Putin, í Sankta Pætursborg, og útlendskir miðlar vita tíðliga seinnapartin at siga, at her tosaði Witkoff "varmt" við Putin, sum sagt verður.

Tað var eftir samráðingarnar, sum hava verið í norska høvuðsstaðnum Oslo, at serligi sendimaðurin setti kósina til Russlands at hitta russiska forsetan. Í dag er eitt video-brot almannakunngjørt, har sendimaðurin hittir Vladimir Putin.

Í video-brotinum rósar Steve Witkoff russiska forsetanum fyri at vera ein "humanistur", sum hann málber seg.

- Tú tosar nógv um forseta mín, Donald Trump og sigur, at hann er ein humanistur. Tú ert eisini ein humanistur. Eg heiðri teg, rósi tær og takki tær somuleiðis, sigur serligi sendimaðurin í video-brotinum.

Leita vit í Sprotan og skriva "humanist", er tað er persónur, sum leggur dent á vælferð og rættindi hjá menniskjum. Um hetta er galdandi fyri russiska forsetan, Vladimir Putin, kunnu lesarar meta um.

Norskir miðlar vita í dag at siga, at eftir ætlan kemur Steve Witkoff aftur til Oslo, tá hann hevur hitt russiska forsetan. Tað hevur norski forsætisráðharrin, Jonas Gahr Støre, váttað yvirfyri norska kringvarpinum, NRK.