Bruttovinningurin hjá P/F Borg sambært ársroknskapinum 2018 var 32,6 milliónir krónur í mun til 28,9 milliónir árið fyri.
Starvsfólkakostnaðurin var slakar 20 milliónir í mun til 18,1 árið fyri.
Eginogn felagsins er nú 31,2 milliónir krónur. Í roknskapinum fyri 2017 var hon 25,2 milliónir krónur.
Tað verður ikki upplýst í roknskapinum, hvussu nógv felagið hevur goldið fyri partabrøvini í P/F Havnar Timburhandli. Men skuldin hjá felagnum er vaksin úr 48 milliónum krónum upp í 91 milliónir – ein vøkstur upp á 43 milliónir krónur. Eginpeningurin í P/F Havnar Timburhandli var við árslok 39 milliónir krónur.
Felagið skrivar í ársfrásøgnini, at úrslitið eftir skatt var 8,3 milliónir krónur í mun til 7,3 milliónir krónur árið fyri.
Felagið skrivar eisini, at sølan hjá konsernini í stóran mun er ávirkað av gongdini í føroyska búskapinum, serliga byggivinnuni.
Leiðslan metir, at felagið framhaldandi fer at hava positiva gongd í 2019, og metir felagið, at tað fer at økja um virksemið, at felagið tekur yvir raksturin av Havnar Timburhandli.
– Felagið hevur vónir um, at hetta fer at geva eitt positivt ískast til raksturin, skrivar felagið.
Stjóri í P/F Borg er Rodmundur Nielsen
Nevndarformaður er Lars Peter Nielsen, Skibby
Nevndarlimir eru Óli Marnar Christiansen, Klaksvík og Rodmundur Nielsen, Glyvrar.
Ársúrslitið hjá P/F Borg í fjør er tað besta í søgu felagsins. Úrslitini hjá P/F Borg síðan byrjan í 2005 hava verið hesi:
Ár krónur
| 2018: | 8.303.000 |
| 2017: | 7.269.000 |
| 2016: | 4.649.000 |
| 2015: | 2.140.000 |
| 2014: | 2.460.000 |
| 2013: | 126000 |
| 2012: | 967000 |
| 2011: | -342000 |
| 2010: | -1.965.000 |
| 2009: | -3.942.000 |
| 2008: | -353000 |
| 2007: | 515000 |
| 2006: | -786000 |
