Liðið hjá Mattiasi H. Lamhauge, Strømsgodset spældi í kvøld dyst á útivølli í norsku steypakappingini móti Molde, ið spælir í bestu norsku fótbóltsdeildini.
Molde hevði eina sera stóra favorittstøðu undan dystinum, og teir livdu eisini upp til hana við at vinna 4-1 á Strømsgodset, ið er næstfremst í næstbestu deildini.
Simo Lampinen-Skaug vardi málið hjá Strømsgodset fyrsta tíman av dystinum, men mátti síðani skaddur av vøllinum, og tí mátti Mattias verja málið seinasta hálva tíman. Tá Mattias kom á vøllin var støðan 2-1 til heimaliðið. Heimaliðið økti til 3-1 í 89. minutti, og aftur til 4-1 í tíðini dómarin hevði lagt aftrat.
Strømsgodset má nú fokusera upp á at halda annað plássið í næstbestu deildini, ið gevur teimum beinleiðis uppflyting til bestu deildina.
Haugesund er fremst í deildini við 62 stigum, Strømsgodset hevur 60 stig á øðrum plássinum. Kongsvinger hevur 59 stig á triðja plássinum, og Stabæk hevur 55 stig á fjórða plássinum.
Megnar Strømsgodset ikki at enda millum tvey tey ovastu liðini, so mugu teir spæla Play Off dystir um uppflyting.
Í næstseinasta umfarinum hevur Strømsgodset dyst á heimavølli komandi sunnudag klokkan 16 móti Moss. Strømsgodset spælir dyst á útivølli í seinasta umfarinum móti Stabæk, sunnudagin 8. november klokkan 12.
