Á Fiskamarknaði Føroya vita tey at siga, at fýra partrolarapør í løtuni eru til fiskiskap, og skipini koma inn at landa, sum næsta vika gongur.

- Fiskiskapurin hjá partrolarunum er smáligur.

Um djúpvatnstrolararnar verður sagt, at ein er á Íslandsrygginum og fiskar tosk, og tveir fiska svartkalva og annan djúpvatnsfisk.

- Haraftrat eru tveir frystitrolarar til fiskiskap.

Av teimum smáu trolbátunum, sum eru til fiskiskap, er ein á landleiðini, har teir fáa flatfisk og eisini nakað av toski.

- Ein er eystanfyri og fær mest av upsa, longu og toski, og so er ein á Skeivabanka, har teir fáa mest av havtasku, toski og longu.

Allir trolbátarnir koma inn at landa í vikuni sum kemur.

Trý garnaskip eru eisini til fiskiskap eftir svartkalva.

- Garnaskipini hava brúkiligan fiskiskap, og øll koma inn at landa hesa vikuna, siga tey á Fiskamarknaði Føroya í dag.