Tað verður av álvara spennandi í Svøríki í kvøld.

Nýggjasta valforsøgnin hjá svenska sjónvarpinum SVT gevur teimum fýra andstøðuflokkunum tilsamans 175 av teimum 349 sessunum í ríkisdegnum. Flokkarnir aftan fyri stjórnina hjá Ulf Kristersson standa til 174 sessir.

Bert ein tingsessur skilur sostatt blokkarnar, og enn er óvist, hvør fær meirilutan.

Hetta er ein munandi broyting í mun til fyrstu valstaðarkanningina hjá SVT fyrr í kvøld. Tá fingu Socialdemokraterna, Vänsterpartiet, Miljöpartiet og Centerpartiet tilsamans 51,3 prosent móti 46,8 prosentum til Moderaterna, Sverigedemokraterna, Kristdemokraterna og Liberalerna.

Nú bendir forsøgnin á eitt nógv javnari val.

Moderaterna stendur sambært SVT til at gerast næststørsti flokkur, meðan Sverigedemokraterna verður nummar trý. Socialdemokraterna stendur til sítt vánaligasta ríkisdagsval í nýggjari tíð, skrivar SVT.

Nýggja forsøgnin byggir á eina statistiska meting av teimum atkvøðum, sum longu eru taldar. Valstaðarkanningin fyrr í kvøld bygdi hinvegin á svar frá veljarum.

Talan er sostatt framvegis um eina forsøgn. Við bert einum sessi á muni kunnu smáar broytingar í undirtøkuni fáa avgerandi týdning fyri, hvør fær meirilutan.

Greinin byggir á forsøgnina hjá SVT, dagførda kl. 20.56 føroyska tíð 13. september.