Leo XIV pávi varð týsdagin skurðviðgjørdur á Gemelli-sjúkrahúsinum í Rom. Undir skurðviðgerðini staðfestu læknarnir lungnaadenokarsinom, sum er eitt vanligt slag av lungnakrabba.

Tað upplýsir Vatikanið í eini fráboðan, sambært tíðindastovuni Reuters.

71 ára gamli pávin varð innlagdur fyri at fáa ein knykil í lunguni tiknan burtur. Knykilin høvdu læknarnir funnið undir eini nýligari heilsukanning.

Sambært AFP sigur Vatikanið, at skurðviðgerðin staðfesti illgrunan um lungnakrabba, sum kanningarnar frammanundan høvdu givið.

Skurðviðgerðin vardi umleið hálvan annan tíma og gekk væl uttan trupulleikar.

– Fyri at tryggja, at nóg mikið varð tikið burtur, varð niðasti partuin av høgra lunga tikin burtur, upplýsir Vatikanið.

Pávin vaknaði sum vanligt eftir skurðviðgerðina og hvílir seg nú á sjúkrastovuni. Roknað verður við, at hann verður á sjúkrahúsinum í eina viku.

Enn er ikki greitt, um krabbin hevur breitt seg. Ein ónevnd kelda í Vatikaninum sigur við AFP, at fleiri kanningar verða gjørdar.

Allar móttøkur hjá pávanum eru avlýstar fram til 20. oktober. Eftir ætlan skal hann á eina 11 daga ferð til Uruguay, Argentina og Peru frá 6. til 17. november.

Hetta er fyrstu ferð, at Leo XIV hevur havt ein álvarsligan heilsutrupulleika í teimum 17 mánaðunum, hann hevur verið pávi.

Hann er kropsliga virkin og dámar serliga væl at spæla tennis. Hann roykir ikki og hevur sambært tíðindunum ikki áður havt heilsutrupulleikar.

Undanmaður hansara, Frans pávi, var fleiri ferðir innlagdur seinastu árini av lívi sínum. Hann doyði í apríl 2025, 88 ára gamal.

/ritzau/