Ein dómstólur í Las Vegas hevur týsdagin dømt fyrrverandi bandeleiðaran Duane »Keffe D« Davis millum 40 ára fongsul og lívlangt fongsul fyri drápið á Tupac Shakur.
Tað skrivar tíðindastovan Reuters.
63 ára gamli Davis varð í august funnin sekur í drápi. Týsdagin varð revsingin ásett í málinum, sum í nærum 30 ár hevur verið eitt av kendastu óuppkláraðu drápsmálunum í USA.
Tupac Shakur, eisini kendur undir listamannanavninum 2Pac, varð skotin úr einum bili í Las Vegas 7. september 1996. Hann doyði nakrar dagar seinni, bert 25 ára gamal.
Hann verður roknaður sum ein av teimum rapparunum, ið hava havt størsta ávirkan á tónleikaslagið.
Ákæruvaldið hevur lagt Davis undir at hava staðið á odda fyri at leggja drápið til rættis. Sambært ákæruni var talan um hevnd fyri, at Shakur og fleiri onnur sama kvøld høvdu lopið á bróðurson Davis á einum kasino í Las Vegas.
Davis varð ikki handtikin fyrr enn í 2023.
Løgreglan hevur upplýst, at hon leingi hevði havt illgruna um hansara leiklut, men at prógvini ikki vóru nóg sterk til at reisa ákæru, fyrr enn hann sjálvur greiddi frá í miðlunum og í endurminningum sínum.
Hesar almennu útsagnirnar og upptøkur hjá kanningarfólkunum vóru millum høvuðsprógvini í málinum.
Verjin hjá Davis hevur ført fram, at útsagnirnar bert vóru reyp, sum onnur prógv ikki stuðlaðu.
Undir rættarmálinum spældi ákæruvaldið fleiri tímar av upptiknum samrøðum. Á teimum greiddi Davis frá, at hann var í øðini eftir álopið á bróðursonin.
Sambært frágreiðing hansara koyrdu hann og tríggir aðrir menn, teirra millum bróðursonurin, út í einum hvítum Cadillac at leita eftir Shakur.
Davis greiddi frá, at hann rætti eina pistól aftur á baksetrið. Tá teir fingu eyga á bilin hjá Shakur, fór annar av teimum báðum monnunum á baksetrinum at skjóta.
Ákæruvaldið hevur ikki navngivið mannin, sum skal hava latið skotini av. Hóast Davis nú er dømdur, er sostatt ikki endaliga staðfest, hvør skeyt rapparan.
Hinir tríggir menninir, sum vóru í bilinum saman við Davis, eru allir deyðir.
Davis hevur noktað seg sekan. Sambært lóggávuni í Nevada kann hann tó verða dømdur fyri dráp, hóast tað ikki var hann sjálvur, sum skeyt. Hann hevði frammanundan boðað frá, at hann ætlar at kæra dómin.
Í 1990-árunum var Davis leiðari fyri Southside Compton Crips, einum banda úr Los Angeles-økinum. Hann var í stríði við Mob Piru, sum hevði samband við Shakur og plátufelag hansara, Death Row Records.
Drápið á Shakur gjørdist eitt vegamót í rappsøgu og gav stríðnum millum rapparar á amerikansku eystur- og vesturstrondini enn størri ans.
Ritzau
