Trý føroyingalið vóru í leiki í EHF European League í kvøld.
Bjarni í Selvindi (myndin), Allan Norðberg og liðfelagarnir í Vali vunnu í innleiðandi bólki H ein flottan 38-34 sigur á ungarska liðnum, Tatabanya. Í steðginum var støðan javnleikur 16-16.
Bjarni skoraði sjey mál upp á 12 málroyndir, og hann var næstbesti málskjúttin hjá Vali. Allan hevði tríggjar málroyndir, men eingin sat í netinum.
Í sama bólki taptu Magnus Árason og liðfelagarnir í Mors-Thy á heimavølli 30-36 fyri slovenska liðnum, Slovan Ljubljana. Í steðginum var útiliðið á odda 17-14. Magnus hevði tvær málroyndir, men hevði ikki eydnuna við sær.
Aftaná trý umfør er Slovan fremst við seks stigum. Valur hevur fýra stig, Mors-Thy hevur tvey stig, og Tatabanya er aftast við ongum stigi.
Í innleiðandi bólki F taptu Teis Horn Rasmussen og liðfelagarnir í TTH Holstebro á útivølli 30-38 fyri spanska liðnum, BM Torrelavega. Í fyrra hálvleiki gekk væl hjá Holstebro, og í steðginum var støðan javnleikur 16-16.
Teis fekk tveir málmøguleikar, og hann setti báðar í netið.
Aftaná trý umfør er Torrelavega fremst í bólkinum við seks stig. TTH Holstebro hevur fýra stig, og Benfica hevur tvey stig. Aftast í bólkinum er Karvina við ongum stigi.
