Pólski forsætisráðharrin, Donald Tusk, upplýsir, at Russland eftir øllum at døma aftur hevur gjørt seg inn á loftrúmið hjá landinum.
- Fráboðanir, sum eg havi fingið, benda á, at russar aftur hava gjørt seg inn á okkara loftrúm, men í morgun er eingin hóttan.
Pólski herurin skrivar á X, fyrrverandi Twitter, at tey hava hugt ígjøgnum dátur á radarskipanini í samband við møgulig brot.
Verjumálaráðharrin í Póllandi, Wladyslaw Kosiniak-Kamysz, sigur sambært tíðindastovuni Reuters, at ein russisk stýrirakett helst er dottin niður í Póllandi.
– Hetta er enn ein russisk provokatión, sigur hann og leggur aftrat, at Pólland fer at biðja Nato um stuðul.
Sambært pólskum myndugleikum vóru tað ellivu lutir, sum hóttu pólskt loftrúm í nátt, og av teimum komu tríggir inn um markið.