Demokraturin Roy Cooper vann senatsvalið í amerikanska statinum North Carolina.
Tað skriva tíðindastovan Associated Press og NBC News.
Sigurin á republikanaranum Michael Whatley gevur Demokratunum ein týdningarmiklan sess í royndini at taka meirilutan í Senatinum frá Republikanarunum.
– Vit vistu, at ruðuleikin og korrupsjónin í Washington skaddu fólkið hjá okkum. Í dag hava tit sagt, at hetta má steðga, segði Cooper sambært CNN við fegnar stuðlar í býnum Raleigh.
Væl kendur millum veljararnar
Senatssessurin var leysur, tí republikanski senatorurin Thom Tillis hevði valt ikki at stilla uppaftur.
69 ára gamli Roy Cooper hevur áður verið guvernørur í North Carolina. Sambært Reuters var hann væl kendur millum veljararnar í øllum statinum og hevði bygt upp eina greiða leiðslu í veljarakanningunum við sterkum stuðli frá óheftum veljarum.
Michael Whatley er fyrrverandi formaður í landsnevndini hjá Republikanarunum og hevur ongantíð havt eitt fólkavalt embæti.
Trump hevði sjálvur valt Whatley sum valevni í North Carolina og stuðlaði honum dyggiliga í valstríðnum.
Cooper legði dent á høgu prísirnar á matvørum og orku, samstundis sum undirtøkan hjá Trump millum veljararnar minkaði.
Fýra sessir kunnu broyta valdsbýtið
Undan valinum høvdu Republikanararnir 53 av teimum 100 sessunum í Senatinum.
Demokratarnir skulu vinna fýra sessir frá Republikanarunum fyri at taka meirilutan, treytað av at teir samstundis varðveita sínar egnu sessir.
Á miðvalinum í dag vóru 35 senatssessir upp á val. Í sjey statum varð mett, at kappingin millum flokkarnar var so tøtt, at úrslitið kundi fara báðar vegir.
Eisini allir 435 sessirnir í Umboðsmannatinginum, sum er hitt kamarið í Kongressini, vóru upp á val. Har verður ein limur valdur úr hvørjum valdømi fyri tvey ár í senn.
Ritzau
