Hví er Føroyabanki stongdur frá ársbyrjan til mai ella juni, tá gýtingin hjá toskinum sambært Sámal Peturi í Grund vanliga ikki er fyrr enn seinni á vári?
Hetta er ein av spurningunum, sum løgtingsmaðurin setur Bárði á Steig Nielsen, landsstýrismanni í uttanríkis- og fiskivinnumálum, í einum skrivligum fyrispurningi.
Sámal Petur í Grund vil hava greiðu á, hvørjar ítøkiligar lívfrøðiligar grundgevingar eru fyri longu friðingartíðini á Føroyabanka.
Hann samanber við landgrunnin, har gýtingarleiðirnar sambært fyrispurninginum í høvuðsheitum eru friðaðar í sjálvari gýtingartíðini, vanliga frá miðjum februar ella mars til miðjan apríl ella mai.
Óttast kapprenning eftir fiskinum
Í viðmerkingunum leggur Sámal Petur í Grund dent á, at fiskiskapurin á Føroyabanka eigur at byggja á lívfrøðiliga vitan og burðardygga umsiting, sum verjir gýtingina.
Men um greið lívfrøðilig prógv ikki tala fyri at stongja bankan longu frá 1. januar, heldur hann skipanina vera óskynsama.
Hann vísir millum annað á, at nógv skip fara út í senn, tá bankin letur upp eftir drúgva stongsilin. Eftir hansara meting økir hetta trýstið á leiðina, heldur enn at fiskiskapurin verður býttur javnari yvir eitt longri tíðarskeið.
Hann heldur eisini, at stutta fiskitíðin ger tað torførari hjá loyvishavarunum at leggja raksturin til rættis eftir veðri, streymi og marknaðarviðurskiftum.
Spyr um góðsku og gýting
Sámal Petur í Grund vísir harumframt á, at toskurin er í verri standi beint eftir gýting. Hann heldur tí, at tíðaravmarkingin kann hava avleiðingar fyri bæði góðsku og avreiðingarprís.
Landsstýrismaðurin verður biðin um at upplýsa, um lívfrøðilig prógv eru fyri, at bankatoskurin savnast til gýtingar ella gýtir munandi fyrr ella yvir longri tíð enn toskurin á landgrunninum.
Eisini spyr tingmaðurin, um landsstýrið í samráði við Havstovuna ætlar at laga friðingartíðina, so hon betur samsvarar við gýtingartíðina og loyvir varligum vinnuligum fiskiskapi undan gýting.
