Tað boðaði Pedro Sánchez frá í einari røðu til tjóðina mánadagin.
– Vit mugu endurnýggja stuðulin frá fólkinum, segði hann sambært Reuters.
Hann segði eisini, at stjórnin hevur tørv á einum nógv størri progressivum meiriluta í tjóðartinginum, um hon skal kunna fremja nýggjar sosialar broytingar.
Sánchez, sum umboðar sosialistaflokkin PSOE, hevur verið forsætisráðharri í Spania síðani 2018.
Bústaðarkreppan trýstir stjórnina
Avgerðin um at útskriva val kemur eftir, at stjórnin fríggjadagin tapti í tjóðartinginum í sambandi við tvey lógaruppskot um bústaðarmarknaðin.
Bústaðarmálið hevur elvt til stór mótmæli í Spania seinastu tíðina. Mótmælisfólk krevja, at stjórnin grípur inn, tí bæði húsaleiga og bústaðaprísir eru vorðnir ov høgir.
Miðalhúsaleigan í Spania er umleið tvífaldað seinastu tíggju árini.
Leygardagin vóru tíggjutúsundtals fólk á gøtunum í Madrid. Ónøgdin tók serliga dik á seg, eftir at ein 87 ára gomul kvinna í september varð koyrd úr heimi sínum, tí hon ikki hevði ráð at gjalda eina brádliga og stóra húsaleiguhækking.
Ein persónur á barr í Madrid fylgir við, meðan Pedro Sánchez í dag boðar frá, at val verður í Spania 29. november. Mynd: Juan Medina/Reuters
Val skuldi annars ikki verið fyrr enn í 2027
Seinasta tjóðartingsval í Spania var í 2023, og næsta val skuldi í seinasta lagi verið 22. august 2027.
Nú verður tað í staðin 29. november.
Sambært teimum veljarakanningum, sum Ritzau vísir til, liggur konservativi flokkurin Partido Popular framman fyri PSOE. Høgravendi Vox-flokkurin kann eisini fáa ein týðandi leiklut í stjórnarsamráðingunum eftir valið.
Um Partido Popular og Vox enda í stjórn saman, verður tað fyrstu ferð, at ein flokkur av ytsta høgravonginum kemur í sponsku landsstjórnina, síðani landið gjørdist fólkaræði eftir deyða Francos í 1975.
Pedro Sánchez hevur eisini verið undir politiskum trýsti av øðrum orsøkum. Altjóða hevur hann millum annað markerað seg við hvassari atfinning móti Ísrael og teimum, hann hevur nevnt „tøkni-oligarkar“. Heima í Spania hevur hann samstundis verið merktur av fleiri politiskum málum, teirra millum ákærum um mutur móti konuni, Begoña Gómez.
