Triðja seyðahundakappingin í kappingarárinum 2026/2027 verður hildin leygardagin og sunnudagin 14. og 15. novembur, tá Eysturoyar Seyðahundafelag skipar fyri seyðahundakapping millum Fjarða.
Kappingin verður hildin á náttúruvakra økinum beint við frákoyringina av vegnum millum Fjarða og Funningsfjørð. Økið er bæði áskoðaravinarligt og høgligt hjá luttakarunum.
Seyðurin, sum verður nýttur til kappingina, kemur úr tveimum hagapørtum, Grønunum og Mørkini. Hetta eru hagar, ið liggja lið um lið og hava sama eigara.
Luttakararnir møta kl. 08.30 til banagjøgnumgongd, og kappingin byrjar kl. 09.00. Hvør luttakari fær 13 til 15 minuttir til at gjøgnumføra banan.
Leygardagin kappast hundarnir í klasa 3, og higartil eru 18 hundar teknaðir til kappingina.
Sunnudagin kappast hundarnir í klassa 2 og 1, og møguleiki verður at tekna seg til hesa kappingina heilt fram til kappingarbyrjan sunnudagin.
Dómarin til kappingina hetta vikuskifti er Eyðstein Jensen. Hann er royndur dómari, sum eisini hevur verið við til fleiri seyðahundakappingar, við góðum úrslitum.
Veðurforsøgnin til hetta vikuskifti er rættiliga ivasom, og boðað verður frá kava/regni og fitt av vindi. Veðrið fær man ikki gjørt nakað við, og um tað ikki viðrar leygardagin, so verður ein roynd gjørd sunnudagin, til at fáa alla kappingina avgreidda, tvs. klassa 1, 2 og 3.
Støðan í FM 2026/2027 eftir tvær kappingar
Anna Sofía Fjallheim við Midge – 9 stig
Anna Sofía Fjallheim við Kelly – 8 stig
Jónstein Petersen við Kvikk – 7 stig
Tóroddur Vang við Svan – 7 stig
Rene Hansen við Taff – 6 stig
Tummas Jacobsen við Moss – 6 stig
Ketty Winther við Glen – 4 stig
Kappingin er sera spennandi. Úrslitini í teimum báðum undanfarnu kappingunum hava verið ógvuliga ymisk, og tí er kappingin púra opin.
Øll eru vælkomin forbí at hyggja at kappingini, og síggja bestu seyðahundarnar í landinum kappast um FM heitið. Vit bjóða kaffi, te og møguleikan til at fáa eitt hugnaligt seyðahundaprát.
