Tvey føroyingalið vóru í leiki í bestu íslendsku hondbóltsdeildini í kvøld, og bæði vóru fyri tapi.

Liðið hjá Allani Norðberg og Bjarna í Selvindi, Valur tapti í Hafnarfirði 31-35 fyri FH. Í steðginum var Valur á odda 18-17.

Aftaná fimm sigrar á rað endaði sigursrøðin hjá Vali í kvøld.

Bjarni skoraði fýra mál upp á sjey málroyndir, og hann legði upp til eitt mál, og vann liðnum eitt brotskast. Allan skoraði fýra mál upp á fimm málroyndir.

Valur er triðfremst í deildini við 14 stigum. Haukar eru fremst við 20 stigum.

Trúgvi Hávardsson og hinir í HK taptu á útivølli 28-32 fyri Fram. Í steðginum var Fram á odda 16-11.

Trúgvi skoraði fýra mál upp á níggju málroyndir, og hann legði upp til tvey mál, og hann vann liðnum tvey brotskøst.

HK er nummar 10 í deildini við seks stigum.