Annarflogskiparin á einum flogfari úr Dubai til Ísraels royndi mikudagin at fremja eitt yvirgangsálop.

Tað sigur ovasti ákærin í Sameindu Arabisku Emiratunum leygardagin, sambært almenna tíðindastovinum WAM. Reuters ber tíðindini.

Sambært ákæranum leyp annarflogskiparin á flogskiparan við einari øks inni í stýrishúsinum. Talan var um eina neyðøks, sum vanliga verður goymd í stýrishúsinum og er ætlað til neyðstøður.

Tilburðurin, tá flogfarið hjá Flydubai misti fleiri túsund metrar í hædd eftir sera stuttari tíð, verður framvegis kannaður.

Tvær ónevndar keldur við kunnleika til málið siga við CNN, at illgruni er til annarflogskiparan Hamam al-Hammami úr Oman. Reuters nevnir sama navn við tilvísing til eina ónevnda keldu við beinleiðis kunnleika til málið.

Sambært keldunum hjá CNN varð hann koyrdur úr einum øðrum starvi hjá tjóðarflogfelagnum í Oman vegna stúran um víðgongd sjónarmið.

Ísraelski forsætisráðharrin, Benjamin Netanyahu, hevur áður sagt, at annarflogskiparin hevði verið fyri víðgongdari islamistiskari ávirkan. Hann segði tó eisini, at motivið ikki var staðfest.

Ovasti ákærin sigur, at kanningarnar halda fram fyri at staðfesta umstøðurnar, motivið og møgulig sambond. Bæði ítøkilig og talgild prógv verða kannað.

Fríggjadagin greiddi indiski flogskiparin, Smit Machchhar, fyri fyrstu ferð alment frá bardaganum um at fáa tamarhald á flogfarinum.

Í einari videosamrøðu við indiska forsætisráðharran, Narendra Modi, greiddi hann frá sjúkrasongini frá, hvussu tað við neyð og deyð eydnaðist honum at lata hurðina til stýrishúsið upp og fáa hjálp.

– Eg var so illa særdur, at eg var fallin saman. Eg merkti, at flogfarið var á veg niður. Eg visti, at eg mátti royna eina síðstu ferð at fáa hurðina upp, segði hann.

– Eisini tá varð eg raktur, men eg fekk hurðina upp, og øll komu inn, segði flogskiparin.

Narendra Modi segði, at flogskiparin við sínum gerðum hevði bjargað nógvum mannalívum og forðað fyri einari stórari vanlukku.

Ritzau