Tilsamans skal føroyska heilsuverkið spara 14,7 milliónir krónur í 2027.

Tað upplýsir Eyðdis Hartmann Niclasen, landsstýriskvinna í heilsumálum, í svari til Sirið Stenberg, løgtingskvinnu, sum hevur spurt um sparingarnar og avleiðingarnar av teimum.

Á Landssjúkrahúsinum verður starvsfólkahópurin eftir ætlan minkaður við fimm til seks kliniskum starvsfólkum. Á Klaksvíkar Sjúkrahúsi og Suðuroyar Sjúkrahúsi verður eitt starv spart burtur á hvørjum sjúkrahúsi.

Talan er bæði um størv, sum hava beinleiðis samband við sjúklingar, og størv innan tekniska økið.

Harumframt eru starvsfólkaavleiðingar á Heilsustýrinum, har enn ikki er endaliga avgjørt, hvussu sparingarnar skulu fremjast. Í Heilsu- og orkumálaráðnum er eitt fulltrúastarv longu niðurlagt.

Sjúklingar og bíðilistar verða ávirkað

Landsstýriskvinnan staðfestir, at sparingarnar fara at fáa avleiðingar fyri sjúklingar, bíðilistar og nýtsluna av konsulentum.

Tað er tó ikki endaliga greitt, hvørjar avleiðingarnar verða.

– Í síni heild skal væntast, at sparingarnar í størri ella minni mun koma at hava ávirkan á hesi viðurskifti, stendur í svarinum.

Sparingarnar á sjúkrahúsunum eru tilsamans 6,75 milliónir krónur. Landssjúkrahúsið skal spara 5,05 milliónir, Klaksvíkar Sjúkrahús 900.000 krónur og Suðuroyar Sjúkrahús 800.000 krónur.

Tríggir serlæknar kunnu ikki setast

Ein onnur avleiðing er, at tríggir serlæknar, sum væntandi verða tøkir at seta í starv næsta ár, ikki kunnu fáa starv á Medisinska depli.

Orsøkin er, at eingin peningur er settur av til serlæknapuljuna í fíggjarlógaruppskotinum fyri 2027.

Talan er um serøki, har allar verandi starvsnormeringar eru brúktar. Uttan eina serlæknapulju ber tí ikki til at seta fleiri serlæknar innan hesi økini.

Eisini verða ætlanirnar um tvey nýggj kommunulæknastørv í 2027 lagdar til viks, tí eingin játtan er til tey.

Tó er peningur játtaður til tvey nýggj kommunulæknastørv í 2026, og væntandi verður annað teirra ikki sett fyrr enn í 2027.

Tilboð til kvinnur verður væntandi niðurlagt

Ein onnur sparing rakar verkætlanina Ein góð byrjan, sum fær 450.000 krónur í stuðli.

Hetta er eitt ókeypis bólkatilboð til kvinnur, sum í viðgongutíðini ella eftir barnsburð stríðast við ótta, tunglyndi ella annan sálarligan mistrivnað.

Stuðulin verður eftir ætlan strikaður næsta ár, og tí verður tilboðið væntandi niðurlagt.

Kvinnurnar skulu í staðin venda sær til kommunulæknan, sum kann ávísa tær til sálarfrøðing ella í serligum førum til psykiatriina.

Landsstýriskvinnan upplýsir tó, at Heilsutrygd er biðið um at koma við uppskoti um, hvussu eitt líknandi tilboð kann skipast innan verandi skipanir.

Sjúklingar missa stuðul til viðgerðarferðir

Eisini verður stuðulin til Giktafelag Føroya og Føroya Psoriasisfelag strikaður.

Feløgini hava seinastu árini skipað fyri viðgerðarferðum til Kroatia, har umleið 20 sjúklingar árliga hava fingið klimaviðgerð.

Stuðulin er ein millión krónur.

Verður stuðulin tikin burtur, verður tað framyvir upp til serlæknarnar at meta um, hvørjir sjúklingar skulu ávísast til slíka viðgerð.

Landsstýriskvinnan sigur, at hetta kann hava við sær, at sjúklingar bert í serstøkum førum verða sendir til klimaviðgerð í Kroatia.

Her skulu 14,7 milliónir sparast

Sambært svarinum hjá landsstýriskvinnuni er býtið av sparingunum í 2027 hetta:

Sparingin á 3,5 milliónir krónur í heilsutrygdarveitingum er knýtt at ætlanini um at seta eitt heilivágsráð.

Kelda: Svar frá Eyðdis Hartmann Niclasen, landsstýriskvinnu, til §52a-fyrispurning nr. 52-069/2026 frá Sirið Stenberg.