Volodymyr Zelenskyj, forseti í Ukraina, og Hákun kongur í Noregi umrøddu týsdagin ukrainsk børn, sum Russland hevur burturflutt.

Teir hittust á kongshøllini í Oslo í sambandi við vitjanina hjá ukrainska forsetanum í Noregi.

– Vit umrøddu, hvussu ukrainsk børn, sum Russland hevur rænt, kunnu koma heim aftur. Vit skulu fáa øll ukrainsk børn heim. Vit umrøddu, hvørji stig vit kunnu taka fyri at røkka hesum, skrivar Zelenskyj á sosialum miðlum.

Sambært ukrainska forsetaskrivstovuni hava Ukraina og altjóða samstarvsfelagar higartil fingið 2.689 børn aftur. Zelenskyj takkaði Noregi fyri hjálpina við at fáa børnini heim og stuðulin til teirra afturkomu í ukrainska samfelagið.

Teir umrøddu eisini humaniteru støðuna í býnum Olesjky, sum Russland hevur hersett. Zelenskyj greiddi konginum frá ukrainsku royndunum at hjálpa fólkunum har.

Fleiri fundir í Oslo

Zelenskyj er í dag í norska høvuðsstaðnum, har hann eisini hittir Jonas Gahr Støre, forsætisráðharra Noregs, og Alexander Stubb, forseta Finnlands.

Amerikanski serligi sendimaðurin Steve Witkoff er eisini komin til Oslo at taka lut í samráðingunum um kríggið í Ukraina. Jared Kushner tekur lut umvegis netið.

Sambært norsku stjórnini bað Zelenskyj Noreg og Finnland um at skipa fyri fundinum sum lið í teimum diplomatisku royndunum, ið eru í gongd.

– Málið er at fáa diplomatiska arbeiðið inn á eina meira konstruktiva leið, hevur Støre sagt.

Zelenskyj skal eisini hitta forsetan og parlamentarisku leiðararnar í norska Stórtinginum.