Samstundis boðar hann frá nýggjum russiskum álopum á orkukervið í Ukraina.

Amerikanski forsetin, Donald Trump, boðaði seinnapartin frá á Truth Social, at Russland og Ukraina hava gjørt avtalu um eina vápnahvíld, sum serliga skal verja orkukervi.

– Við virknaði alt fyri eitt er ein orkuvápnahvíld í krígnum millum Russland og Ukraina. Báðir partar eru samdir. Brótið hana ikki, skrivaði Trump.

Tá boðini komu, var avtalan tó ikki staðfest frá hvørki russiskari ella ukrainskari síðu.

Ukrainski forsetin, Volodymyr Zelenskyj, segði stutt eftir, at fráboðanin hjá Trump kom óvart á hann.

– Hetta vóru tíðindi fyri meg, segði Zelenskyj við amerikanska miðilin Axios.

Hann gjørdi tó greitt, at Ukraina er til reiðar at taka undir við eini orkuvápnahvíld, um Russland eisini ger tað.

– Um Trump forseti hevur samrátt seg fram til hetta við Putin, so sigið okkum, nær vápnahvíldin byrjar. Vit eru klár og taka undir við henni, segði Zelenskyj.

Bíða eftir smálutunum frá USA

Seinni skrivaði Zelenskyj á X, at hann hevði tosað við fleiri ríkisleiðarar og NATO-aðalskrivaran, Mark Rutte, um fráboðanina.

Hann skrivaði, at Ukraina stuðlar eini orkuvápnahvíld og bíðar eftir neyvari upplýsingum frá amerikonsku stjórnini.

– Tað er týdningarmikið, at Russland eisini tekur undir við henni, skrivaði Zelenskyj.

ES-nevndarforkvinnan, Ursula von der Leyen, hevur eisini tosað við Zelenskyj og boðað frá stuðli til eini orkuvápnahvíld, sum kann verja orkukervið í bæði Ukraina og Russlandi og samstundis verja altjóða matvøruveitingar.

Russland rakti orkukervið eftir fráboðanina

Men fáar tímar eftir fráboðanina hjá Trump segði Zelenskyj, at Russland framvegis hevði lopið á ukrainsk orkukervi.

Sambært honum rakti ein russisk Shahed-drona eitt kraftverk í Kyiv, og fleiri býlingar mistu streymin.

Seinni vóru eisini álop á orkustøð í Kharkiv-landslutinum.

Zelenskyj legði dent á, at hesi álopini komu eftir, at Trump hevði boðað frá eini orkuvápnahvíld við sum var komin í gildi alt fyri eitt.

Tað er tí enn ógreitt, um talan í veruleikanum er um eina avtalu, sum báðir kríggjandi partar hava góðkent og sett í verk.

Zelenskyj: 60 dagar við fullari vápnahvíld – so halda vit val

Fyrr í dag svaraði Zelenskyj eisini upp á atfinningar frá Trump um, at Ukraina eigur at halda forsetaval.

Í samrøðu við ABC News segði hann, at Ukraina kann halda val, um Russland góðtekur eina fulla vápnahvíld í 60 dagar.

– Gevið okkum tveir mánaðir, 60 dagar við fullari vápnahvíld, so halda vit val, segði Zelenskyj.

Hann hevur eisini víst aftur útsøgnunum hjá Trump um, at ukrainsk álop á russisk orkukervi eru høvuðsorsøkin til hækkandi diesel- og bensinprísir.

Sambært Zelenskyj er orsøkin í staðin kríggið í Miðeystri.