Hóast minkandi kvotur av svartkalva, rækjum og kongafiski, so kemur Polar Seafood Group úr 2024 við einum tryggum úrsliti uppá 119 milliónir krónur áðrenn skatt og minnilutaáhugamál, samanborið við 84 milliónir krónur í 2023.
Tað vísir ársfrágreiðingin hjá Polar Seafood, sum júst er kunngjørt.
Úrslitið fyri 2023 er tó bert partvíst sambærligt, tí allir trolararnir hjá Polar Seafood í 2023 vóru leingi á skipasmiðju.
Stjórin í Polar Seafood, Bent Salling, letur æruna fyri nøktandi úrslitið víðari til starvsfólkini.
– At vit hava kunnað rokkið hesum úrslitið í einum ári, har TAC (samlaða loyvda veiðan) fyri rækjur aftur er minkað, vísir greitt, at vit hava virkin og dugnalig starvsfólk í øllum felagnum, og tað eru vit sera takksom fyri, sigur Bent Salling.
Íkast til búskapin
Jaliga úrslitið merkir, at Polar Seafood eisini hevur gagnað grønlendska búskapinum munandi í ár.
Útgoldnar vórðu 528 mió. kr. í lønum til starvsfólk hjá Polar Seafoods og 411 milliónir krónur í útgjaldingum til uttanhýsis fiskimenn. Harumframt hevur felagið goldið 175 milliónir krónur í veiðugjaldi.
##med2##
– Eg fegnist um, at vit saman hava skapt eitt so gott og fínt úrslit. Fyrst og fremst merkir tað, at vit skapa arbeiðspláss og arbeiðstrygd til okkara starvsfólk, og tað hevur týdning fyri okkum. Í øðrum lagi merkir okkara góðu úrslit, at vit gjalda skatt – og harvið stuðla okkara felags vælferð. Seinast men ikki minst eri eg glaður fyri, at vit vinna pening, tí tað ger okkum før fyri at framtíðartryggja fiskiskapin. Tann partin av vinninginum, sum ikki fer til lønir, útgjaldingar til uttanhýsis fiskimenn og veiðugjøld – tað brúka vit til at gera íløgur aftur í felagið, sigur fyrisitingarstjórin í Polar Seafood, Miki Brøns.
Svørt skýggj
Hóast 2024 var eitt nøktandi ár, so eru fleiri viðurskifti, sum væntandi fara at ávirka veiðuna negativt í longdini.
Tað er munandi óvissa í altjóða handlinum, og samstundis er TAC fyri rækjur í Vesturgrønlandi minkað við 18 prosentum afturat. Men tað størsta, sum fer at ávirka úrslitið fyri 2025 negativt, er nýggja fiskivinnulógin og fyrisitingarskipanirnar í henni. Tær merkja, at Polar Seafood missir ein triðing av kvotum sínum av svartkalva, og tað merkir, at tey raktu skipini missa millum 40 og 50 prosent av sínum vinningi áðrenn fíggingarkostnaðin.
Politiskt sjálvmál
Polar Seafood tekur undir við, at TAC er lækkað fyri at tryggja burðardygga veiðu, men vísir samstundis á, at lægri veiðan ger tað enn vandamiklari, at grønlendska landsstýrið í løtuni velur at taka kjansir við fíggjarviðurskiftunum hjá fiskivinnufeløgunum. Polar Seafood er av teirri áskoðan, at tørvur er á at eftirmeta mátan, tilfeingisrentan fyri rækjur verður roknað upp, soleiðis at hon fylgir nærri teimum stóru broytingunum í TAC, sum beinleiðis ávirka inntøkurnar hjá feløgunum.
– Fiskivinnan er full av óvissum. Vit hava ongan trupulleika at liva við teimum óvissum, sum náttúran hevur skapt, men tað er tankavekjandi, at størsta búskaparliga óvissan hjá reiðaríum og starvsfólkum teirra í 2025 er politiskt skapt og fer eisini at skaða búskapin í landinum bæði uppá stutta og langa sikt, sigur Miki Brøns.
Polar Seafood væntar tó ikki, at hesi viðurskifti fara at ávirka ársroknskapin til fulnar. Í 2025 er væntanin, at úrslitið fyri minnilutaáhugamál minkar ein triðing og verður á sama støði sum í 2023 – umleið 84 mió.
