USA hevur boðið russiska forsetanum, Vladimir Putin, til G20-fundin í Miami í desember. Tað segði amerikanski uttanríkisráðharrin, Marco Rubio, mikudagin sambært AFP.

– Skulu trupulleikar loysast, mugu vit hitta fólk, sum vit eru ósamd við, ella sum vit hava trupulleikar við. Tí hava vit boðið Putin forseta til G20, segði Rubio.

Sambært Rubio er fundurin eitt høvi hjá Putin at tosa við Donald Trump, forseta, og aðrar heimsleiðarar. Hann segði seg vóna, at Putin tekur av innbjóðingini.

Rubio hitti mikudagin russiska uttanríkisráðharran, Sergej Lavrov, í New York, har aðalfundur Sameindu tjóða er. Eftir fundin segði Rubio, at bæði Russland og Ukraina hava víst áhuga fyri eini avmarkaðari vápnahvíld, sum fevnir um korn og orku.

Óvist er, um Putin kemur til Miami. Russland hevur enn ikki boðað frá, um hann fer at luttaka. Hann hevur ikki verið persónliga við á einum G20-fundi síðani fundin í Japan í 2019.

Altjóða revsirættardómstólurin, ICC, gav í 2023 út handtøkuboð eftir Putin. Lond, sum eru partar av stovnandi sáttmálanum hjá dómstólinum, hava skyldu at handtaka hann, um hann kemur til teirra land. USA er ikki partur av sáttmálanum. ICC hevur staðfest handtøkuboðini, og USA hevur sjálvt staðfest, at landið ikki er partur av sáttmálanum.

Ukrainski forsetin, Volodymyr Zelenskyj, hevur fyrr í hesum mánaðinum sagt, at hann vil luttaka á G20-fundinum og tosa við Putin, um russiski forsetin eisini kemur. Teir báðir hava ikki hitst andlit til andlits, síðani Russland gjørdi innrás í Ukraina í 2022.

G20 er eitt samstarv millum 19 lond, ES og Afrikanska samveldið um altjóða búskapar- og fíggjarmál.

Ritzau/AFP