Hetland hevur tikið enn eitt stig á leiðini móti undirsjóvartunlum. Oyggjaráðið hevur samtykt eina langtíðarætlan, har tunnilin um Yell Sound verður raðfestur fyrst. Síðani kann verða arbeitt víðari við einum tunli millum Yell og Unst.

Skotska stjórnin hevur staðfest, at 23 milliónir pund verða tøk til fyrireikingararbeiði komandi trý ár. Pengarnir skulu millum annað brúkast til at menna verkætlanina, áðrenn støða kann takast til sjálva byggingina.

Enn er eingin avgerð tikin um at byggja tunnilin. Sambært ShetNews verður kostnaðurin fyri tunnilin til Yell mettur til umleið 525 milliónir pund, sum svarar til umleið 4,6 milliardir krónur, og oyggjaráðið ásannar, at byggingin verður treytað av stórari uttanhýsis fígging. Ráðgevar meta, at tunnilin møguliga kann standa liðugur í 2034, um fíggingin fæst til vega.

Føroyskur tunnilskunnleiki er við í arbeiðinum. Ráðgevarafyritøkurnar Stantec og COWI hava verið við til at kanna møguleikarnar fyri føstum sambandi í Hetlandi. Í umrøðuni av ætlanunum vísir ShetNews eisini á Eysturoyartunnilin sum føroyskt dømi um undirsjóvartunnil millum oyggjar.

Keldur: Hetlandska oyggjaráðið og ShetNews.