Tað endaði 1-1, tá ið NSÍ í kvøld hevði vitjan av grannunum og steypavinnarunum í Víkingi. Bæði málini vórðu skorað í fyrra hálvleiki. Úrslitið ber við sær, at NSÍ framvegis er topplið. NSÍ hevur 45 stig, og nú er munurin aftur til fremsta avbjóðaran tódnaður niður í eitt stig. KÍ hevur 44 stig.

Víkingarnir vóru væl bragdligari stóran part av fyrra hálvleiki, og tá ið tíggju minuttir vóru farnir, eydnaðist tað at fáa úrtøku úr yvirvágini. Rani Hansen, sum aftur í kvøld var fremsti maður, spældi til Jákup Johansen, sum úr 15 metrum sendi bóltin í málið. Hetta var fimta málið hjá Jákupi Johansen í Meistaradeildini í ár.

Víkingur hevði góðar møguleikar at økja um leiðsluna, men tað eydnaðist ikki. Heldur var tað NSÍ, ið sum fyrri hálvleikur leið fekk betri tak á samanspælinum, og í tíðini, sum dómarin legði aftrat fyrra hálvleiki, eydnaðist tað at javna.

Tá ið NSÍ fyri stuttum í Klaksvík í síðstu løtu javnaði til 2-2, var tað miðverjin Daniel Obbekjær, sum við høvdinum setti bóltin í málið, og aftur í kvøld var tað Daniel Obbekjær, sum við høvdinum javnaði til 1-1.

Eftir horna og út frá var tað Jann J. Benjaminsen, sum úr vinstru legði boltin fram í brotsteigin, og har var Daniel Obbekjær fremstur, tá ið hann við høvdinum stýrdi bóltin í málið.

Eftir steðgin var ferðin leingi ikki so stór, sum hon hevði verið undan steðginum. Leingi tóktist tað at ráða meiri um at varðveita javnleikin heldur enn at spenna álopsbogan fyri at vinna sigursmálið. Sum tíðin leið vóru tað bæði møguleikar og støður í báðum endum, og í løtum var spælið gott.

Men tað eydnaðist ikki at skora fleiri mál, og kanska vóru báðir partar ikki nøgdir við úrslitið.

Víkingur tók ikki av, tá ið møguleikin var at vinna fjórða plássið. Nú hevur Víkingur 34 stig og er eitt stig frá fjórða plássinum og B36.

Næsti dystur hjá NSÍ verður fríggjakvøldið ímóti B36.

Næsti dystur hjá Víkingi verður leygardagin, tá ið 07 Vestur verður gestur í Sarpugerði.