Exit-poll: Andstøðan er á odda í Svøríki

Viðhaldsfólk hjá svenska Javnaðarflokkinum bíða eftir fyrstu úrslitunum av ríkisdagsvalinum á Waterfront-miðstøðini í Stokkhólmi 13. september 2026. Mynd: Denis Balibouse/Reuters/Ritzau Scanpix

Exit-poll: Andstøðan er á odda í Svøríki Exit-poll: Andstøðan er á odda í Svøríki

Fyrsta exit-poll kanningin hjá SVT gevur teimum fýra andstøðuflokkunum 51,3 prosent. Stjórnarflokkarnir fáa tilsamans 46,8 prosent.

Eirikur Lindenskov

13. september 2026 kl. 19:15

Andstøðan stendur sterkari enn stjórnargrundarlagið í fyrstu exit-poll-kanningini hjá svenska sjónvarpinum SVT á ríkisdagsvalinum í kvøld. Munurin er 4,5 prosentstig.

Socialdemokraterna, Vänsterpartiet, Centerpartiet og Miljöpartiet fáa sambært kanningini tilsamans 51,3 prosent. Moderaterna, Kristdemokraterna, Liberalerna og Sverigedemokraterna fáa 46,8 prosent.

Socialdemokraterna er framvegis størsti flokkur við 28,4 prosentum. Tað er tó afturgongd samanborið við valið í 2022, tá flokkurin fekk 30,33 prosent.

Sverigedemokraterna hevur størstu afturgongdina millum teir átta flokkarnar. Flokkurin fær 17,2 prosent í kanningini móti 20,54 prosentum á seinasta vali. Moderaterna fær 18,1 prosent og er sostatt næststørsti flokkur í kanningini.

Miljöpartiet hevur størstu framgongdina. Flokkurin fer úr 5,08 prosentum á valinum í 2022 upp í 7,4 prosent. Eisini Vänsterpartiet, Centerpartiet, Kristdemokraterna og Liberalerna standa til framgongd.

Kanningin byggir á svar frá 13.709 veljarum við útvald valstøð og støð, har til bar at atkvøða frammanundan.

Talan er um eina kanning, ikki taldar atkvøður. Endaliga valúrslitið kann tí víkja frá tølunum, og kanningin einsamøll staðfestir hvørki býtið av tingsessum ella, hvør kann skipa stjórn.

Støðan 13. september 2026 kl. 19.06 føroyska tíð.