Løgreglan fekk í gjár fráboðan um, at vegurin hevði givið seg undan einum oljubili hjá Effo inni í Dali á Sandi.

Bilurin hevði 11 tons av olju í tanganum. Ein møgulig orsøk er nógva regnið, men tað er ikki staðfest, hví vegurin gav eftir, sigur vaktleiðarin á politistøðini.

Tað var trupult at fáa bilin leysan. Vegurin var so smalur, at illa bar til at koma framat við kranabili, og heldur ikki bar til at brúka stúttubeinini á kranabilinum.

Seinast løgreglan frætti, var ætlanin at tøma oljuna úr bilinum og gera eina rampu við gróti fyri at fáa hann upp aftur.

Sambært løgregluni stóðst eingin dálking av hendingini.