Vilhelm Poulsen og liðfelagarnir í Hannover-Burgdorf leiktu mánakvøldið dyst á útivølli í týsku bundesliguni móti botnliðnum, HBW Balingen-Weilstetten.
Dysturin endaði við javnleiki 29-29. Við bert átta sekundum eftir á klokkuni javnaði Jonathan Edvardsson fyri Hannover-Burgdorf, so Vilhelm og liðfelagarnir fingu eitt stig við sær. Í steðginum var Hannover-Burgdorf á odda 16-13.
Vilhelm var nærum 20 minuttir á vøllinum, har hann tók síni tøk í verjuni.
Hannover-Burgdorf er nummar átta í deildini við 10 stigum. Teir hava sjey stig upp til tey fremstu liðini Flensburg-Handewitt og liðið hjá Eliasi Ellefsen á Skipagøtu, THW Kiel.
Fríggjakvøldið klokkan 19 hevur Hannover-Burgdorf dyst á heimavølli móti Lemgo.
