Undirtøkan hjá amerikanska forsetanum, Donald Trump, er fallin niður á lægsta stig nakrantíð.

Tað vísir ein kanning, sum greiningarstovnurin Ipsos hevur gjørt fyri tíðindastovuna Reuters.

Í kanningini, sum varð liðug mánadagin, taka 31 prosent av veljarunum undir við Trump. Tað er eitt prosentstig minni enn fyri tveimum vikum síðani.

Spurd, hvønn flokk tey høvdu valt, um kongressval var í dag, svara 47 prosent av skrásettu veljarunum Demokratarnar. 35 prosent høvdu valt Republikanararnar, sum er flokkurin hjá Trump.

Leiðslan hjá Demokratunum á 12 prosentstig er tann størsta í hesum valskeiðinum, skrivar Reuters.

Úrslitið kann styrkja vónirnar hjá Demokratunum um at vinna meirilutan í Umboðsmannatinginum og Senatinum á miðskeiðsvalinum 3. november.

Tá standa allir sessirnir í Umboðsmannatinginum og ein triðingur av sessunum í Senatinum upp á val. Trump er ikki sjálvur upp á val.

Missa Republikanarnir meirilutan í øðrum av kømurunum, kann tað gerast torførari hjá forsetanum at fáa politikk sín framdan tey bæði síðstu árini av valskeiðinum.

Undirtøkan hjá Trump er minkað, síðani hann í februar gav boð um hernaðarálop á Iran í samstarvi við Ísrael. Álopini og gongdin aftaná førdi til, at bensin- og dieselprísirnir hækkaðu nógv.

Ónøgdin við handfaringina hjá forsetanum av búskapinum og livikostnaðinum er stór. Umleið 68 prosent av amerikanarunum eru ónøgd við búskaparpolitikkin hjá Trump. Av hesum siga 37 prosent seg vera republikanarar.

1.279 skrásettir veljarar svaraðu kanningini. Óvissan er trý prosentstig.

Trump ferðast í hesum døgum kring landið á valferð. Har hevur hann heitt á veljararnar um at lata, sum tað er hansara navn, ið stendur á atkvøðuseðlinum.

Kelda: Ritzau